O savez djo fère du chotier (purin) d’ortile (ortie,*), asteure in s’in vo incacher (faire fuir) ches fouans (taupes) pis ches gri-mulos (campagnol) aveuc ches plantes. Pour cho in o à queujir (choisir) intar tros plantes, conme quoi, n’y o gramin d’richesse dins l’ nateure, ch’est-y vré énon ? Os pouyez prinde du jalap (euphorbia lathyris, euphorbe épurge), d’al rue (ruta gravéolens) o bin core du sayu (sambucus nigra, sureau noir).

Jalap :

N’y o core gramin d’ gardiniers qui ditent qui n’y o pon d’ fiate (confiance) à avoir à ch’ jalap pour incacher ches fouans. Ches vyux i n’in métètent in alo (bouquet) éd tros dusqu’à chinq pyés à ches quate cuins d’ ech gardyn. Mais, ch’étot pon toute, i prindètent éch jalap pour eusses faire in apprètaje (préparation) d’éclichaje (pulvérisation) o bin d’arrouzaje. I faut cueiller ches tiges pis ches feules, surtoute ches feules d’ ches bouts qu’alz ont pusse ed forche équ ches vyèlés feules. O z avez qu’à jechter hui chint grammes ed copyaje (hachage grossier) ed jalap dins dix lites d’yow d’ pleufe (pluie), à eine timpérature ed seije à dij-ui edgrés. Laichez ch’ démélaje (mélange) és brajer (se décomposer) deux jours. Après cho, i vous resse à passer éch jus dins ch’ couloir (filtre), pis à rimplir ech l’ éklichoir (pulvérisateur) o bin ch’ l’arouzoir. I n’ faut pon rallonjer ch’ jus d’ jalap, faijez el tour pis ches alintours ed vous parcs (planches) à abrisser (protéger). Si ch’ jus d’ jalap i rinte byen dins l’ terre alorsse ches fouans i devrètent ésn aller s’ vervigner (ramper) dins ch’ gardin d’ech voézin. Tinsion chal sèv ed jalap qu’al arsan.ne à ch’ latex, si qu’al aboute (touche) à vous pyow al peut vous faire attraper eine frapure (irritation, éruption de boutons).

Rue (Incache-cat) : In dit qu’ chal plante al incache ces cats, ches mouques, pis ches mouques à boeu (taon) Ch’est core eine plante equ ches vyux y métètent dins ches plantes à sintimint (aromatiques). In dijot qu’al féjot échorter (avorter). Ch’est eine plante qu’al fé eine belle choque ed chinquante à sochante chintimètes éd hiow, aveuc des byelès feules ver-bleuâtes, pis des fleurs fin gan.nes (jaune vif) à ches biaux jours. Chal rue d’ gardin, al s’ plé dins ches pofes terres, i li faut gramin d’ solèl. Ch’est core eine plante qu’in peut n’in printe gramin d’ jus (produits) edz ols (huiles essentielles) pis core éch tanin. El pu myux, ch’est d’ récour (récolter) ches tijes pis ches feules padvant qu’ chal rue al seuche in fleur, il faut lzé copyier (hacher grossièrement) pis lzé mète dins l’yow d’ pleufe ; pour byen faire ch’est hui chint grammes ed copyiaje éd rue dins dix lites d’yow qui faut laicher s’ brajer huit dij jours. Après cho faut core passer éch jus dins ch’ couloir. Pour ch’ l’arouzoir faut déméler (mélanger) deux lites ed jus aveuc hui lites d’yow. Mettez des wants pour én pon attraper eine frapure pou ch’ dépouillaje (récolte) pis core ech l’apprétaje (préparation).

Sayu : Ch’est in ape qui vient tout seu dins ches camps pis dins ches gardins Il o des fin byelés fleurs blanques in maï, pis des biaux fruits noirs pou faire dal confiture o bin pou laicher minjer à ches oujaux. Cueillez in kilo éd frèchés feulles, copyiez lzé pis jechtez lzé dins dix lites d’yow d’ pleufe. Laichez s’ brajer tros jours pis arrouzez sans rallonjer ch’ jus. Ech pitit sayu (sambucus ebulus, sureau yèble), équ’ ch’est eine erp, i fait gramin pus d’éfé qu’ech sayu noir, equ’ ch’est in ape.

Arprindez vous ton.niaux vous sa à cafuts vous baton-touloir, épis vous arouzoir. Byen éparde ech jus alintour ed ches parcs intar ches routes (lignes) ed légueumes pis dins ches muternes (taupinières) pis ches teunèls (galeries).

Le 09/10/2006 Dziré (Ablain Saint Nazaire, 62) (*) os pouyez arlire chotier d’ortile dins "ches paches à Dziré" ch’est in artique déssaqué el vint-chinq ed sectimpe d’éch l’aney chi.