N’y o quiques aneys, in avot des doutances dsu nous gardinaje familial. In pouyot pinser qu’in allot dire équ ches gardiniers i laichent-è s’inseuver ches bactéries, pis qu’il on invi d’én pon s’ apatrioter aveuc elz autes jins, pis qu’ ches légeumes ed gardin cha porte intérêt à ches cinsiers équ l’ Eta al abloque (subventionne) aveuc gramin d’ doupes prind su ches conterbussyons (impôts). I fo fère du batillaje pou warder ches vyèles-é sortes (variétés) d’ esminches équ l’ Eta al vorot foute à l’ uche. I fo fère du batillaje pou impécher qu’in imbrenne ches camps aveuc ches OGMs.

Achteure, i fo s’ déméfier d’éch l’ Eta qu’al veut fère des loés pou nous artirer l’ drot d’ mète chou qu’in veut dins nous gardin.

In gardinier d’ tardiole (chroniqueur horticole) i s’ avot mis in prousse amon France Inter passe in allot bétot dessaquer in décret in date ach preume ed juyet 2006, pou l’ impécher éd bayer (donner) à ses acouteux (auditeur) edz archettes pou fère leu gardin au nateurel ! t’as qu’ à vir !

In n’ peut pu dire qu’él l’ yow boullante ch’est in fin bon décruaudeux (désherbant) pou ches voyettes (allées) ed gardin. In n’ peut pu dire équ ches feules ed ferkèls (fougères) cha warde au lon ches carplutes (chenilles) ed ches colés (choux).

In n’ peut pu dire ekmint fère du chotier (purin) d’ ortile (ortie), qu’in fé conme cho edpis eune éternam (fort longtemps).

Et ch’est qui z ont buzé à toute, do ! En’ pon savoir arténir és langue su ches bon.nes archettes nateurelles qu’in o pon bzon d’ "homologuer", ch’est avoir el drot ed pa.yer ch’ l’ aminde éd 75 000 Uros pis core aller à l’osto (prison) pou deux aneys.

Pindant ch’ tan-lo, el 29 ed juhin 2006, ches minisses d’ éch l’ agriculture, d’ l’écologie, d’ l’écolomie pis d’él santey

i z ont dessaqué in billet (publié un communiqué) pou ches gazètes pou in rabachaje (réduction) ed ches risques rapor à ches pesticites.

I faudrot in rabachaje ed chinquante du chint ed ches vintes ed ches pesticites industriels ches pus dinjreux". Cha rime pon fort aveuc éch décret dsus ch’ chotier d’ ortile. Ch’est ty pon biau in parel conterdijaje (contradiction) !

Awette, dins ches nouvyèles ch’est tout l’ contrèl ed chou qui nou content ches ablayeux-lo !

Ches OGM, i n’o eu dins ch’ riz qu’ on o acaté à ches Américains, i n’ y in’ n’o eu dins ch’ soja, i n’ o core eu dins des sminches qu’in o acaté à ches américains.

Lo ch’est core pus for, ch’est vint chinq du chint éd ches razières (lots) ed sminche ed bley d’ turc (maïs) qu’al sont impoéson.nées aveuc edz OGM qui vientent el pus souvin éd Monsanto. El loé al dit qu’i peut n’ i avoir in du chint éd saloperies (impuretés) dins ches sminches (d’al pourette o bin core edz ébarzillures éd grayns), ch’est rapor à cho équ ches américains i ditent qui peut n’ y avoir in du chint d’ OGM dins l’ sminche ! Cha ch’est dz étriveux (tricheurs) ches-lo, énon ?

Asteure, mi j’ vo vous dire queumint qu’ej fé dins min gardin. Pour mi, nettier ches tijes ed ches ver-mantiaux (pucerons) qui leu chuchent (sucent) el sève, ej fé in éclichaje (pulvérisation) aveuc du chotier d’ ortile, o bin core eine tisan.ne éd tanaisie.

Pour mi avoir du nitrate pou mes porions pis ches légeumes à feules, ej fé in arouzaje aveuc du chotier d’ortile.

Pour mi avoir du potache (potasse) pou mes légueumes racheines (ech chari (céleri), in preume) ej fé in arouzaje aveuc du chotier éd grante-consoude.

Pour mi, incacher (pouchasser) ches fouans (taupes), ch’est ch’ jalap (l’euphorbe) qu’ in s’ sert in tisan.ne.

Pour mi fère min chotier d’ortile, j’é bzon d’ in syion (seau) o bin d’in tonniau, d’ yow d’ pleufe, pis bé seur d’ortile.

Ech syion pis ch’ tonniau i lzé fo in bos o bin in plastique, in fer cha roullerot bé rate, pis i san.ne a vir équ ch’ a s’ perchrot pis qu’ cha s’ mettrot à pucher (fuir). I fo mète in couvert padzeur chal potée, mi, j’prind in sa à cafuts (sac poubelle) qu’ej li met comme eine cagoule, ech l’in-bos d’éch sa padzeur ech ton.niau, pis chal gueule d’éch sa à ch cul d’éch ton.niau in arployant ch’ plastique padsous ch’ tonniau sans barliké (secouer) ch’ démarlaje (mélange) qui n’i o ddins. Pou mète dins ch’ ton.niau i fo d’el bon.ne yow d’ pleufe, sans clore. T’es verros qui varo in jour qu’el sécrèche (sécheresse), a nous inchpro (gêner) pou nous fère du chotier d’ortile, passe in n’éro pu assé d’yow d’ pleufe.

Fo bé seur, allé récour (récolter) dé grosses brachies (brassées) d’ ortiles su ches rivés (talus). Os pouyez printe ches tijes pis core ches racheines, mé tinsion mes jins à n’ pon printe ches ortiles quanqu’al sont à sminche. Cha frot in mécant anokaje (semis) d’ortile o liu d’ fère éd l’amindiche (engrais) o bin d’ él mordinsèk (mort d’insecte, insecticide).

Si qu’os féjez aveuc ed l’ortile frèche alors i faut in kilo pou dix lites d’yow.

Tout ch’ frèche matryow (matériau) fo n’in fère du copyiaje (le couper grossièrement) padvant d’ jechter ches morciaux d’ortile dins l’yow. Mé miux qu’ ed jechter conme cho tout d’ flouc, ch’est byen miux, d’insaquer ches morciaux d’ortile dins in sa à treyaje (sac ajouré) conme echti pou ch’ tit bos cassé, ches ognons o bin core ech plant d’ peumétère. Cha sro gramin pus luijant (commode) pour vous faire éch coulage (filtration, tamisage).

Si qu’os avez échué (séché) vous ortiles paraît qu’ aveuc chint grammes ed feules sèques ch’est assé pou dix lites d’yow.

Après cho, ech l’ortile al s’in vo s’ brajé (se décomposer) dins l’yow, chou qui fé qu’os érez des bactéries pis d’ puèttes (champignons)

Ech pourrichmint-lo ch’est nateurèl, pis os l’ arconnichrez à ch’ rudmint fort sintimint (odeur) d’ chotier. Chou qu’in veut fère ch’est fère aller ch’ brajaje dusqu’à l’ fermintation, pon dusqu’à l’ définition d’éch pourichmint, ch’ produit i n’ srot mie pus bon à ryen, t’as qu’à vir.

El tan d’él fermintation i cange aveuc el timpérature qui fé déors.

Pour eine timpérature éd 28 dusqu’ à 30 edgré laicher brajer 6-7 jours, pour eine timpérature ed 7 à 10 edgrés fo conter vin jours, pis à 20 edgrés quin jours. Pou avoir in vrémin bon chotier i fo byen l’ raviser in touillant tous ches deux jours dins ch’ tonniau aveuc eine polouche o bin core aveuc in baton, si qu’ech potaje (contenu du pot) i fé mousse (des bulles). Quanqu’ cha fé pus mousse, chal fermintation al est définie.

Aveuc ches tans (durées) qu’in o annonché in fé d’ l’amindiche (engrais). Pou faire du mordinsek, il fo laicher brajer intar in pis quate jours à 20 edgrés.

Si qu’ o volez achinde ches vert-mantiaux, os pouyez laicher brajer eine mitan d’ jour (douze eures) pis fo fère in démarlaje ed tros du chint ed chotier d’ortile dins l’yow, pou l’ éklicher.

Si qu’ o volez achinde el mouque d’él carotte ch’est quate jours ed brajaje pis ch’est in démarlaje ed chinq du chint qui vous fo.

Tinsion pou ches buchettes (buses fines) d’éclichoir fo in vré bon coulage (filtration), sans cha chal buchette al srot bouchée pis n’y érot gramin d’arlotaje, énon ?

Pou ch’ l’amindiche ech démarlaje ch’est à vint du chint.

Ech chotier ch’est rudmint riche in azote pis in fer. Ch’est in réinfortatif ed cruchon pou ches plantes, pis cha leu balle (donne) des forches conte ches maladies.

Pou én’ n’ arvénir à ches actualiteys, n’y o chinq aneys qu’éch l’useine AZF à Toulouse qu’al o campé pis escofié trinte jins pis afolé tros mil jins. Ech l’useine lo, al féjot el min.me nitrate d’ammonium equ’ min tonniau à l’ortile. Seulmint n’y o pon d’ dinjer qu’min tonniau i campe aveuc chou qu’ j’y met ddins, ch’est ty vré, mes jins ?

Le 24/09/2006 Dziré (Ronchin)

pour en savoir plus sur ce même site

la recette sur ce site